काठमाडौं । बंगलादेशकी पूर्वप्रधानमन्त्री तथा बंगलादेश नेसनलिस्ट पार्टीकी प्रमुख खालिदा जिया उपचारका लागि लण्डन प्रस्थान गरेकी छन् ।

बीबीसीको बंगाली सेवाका अनुसार उनी मंगलबार राति १० बजे कतारले पठाएको एयर एम्बुलेन्समा लण्डन प्रस्थान गरेकी हुन् ।

बिएनपीका सहमहासचिव रुहुल कबिर रिजवीद्वारा जारी विज्ञप्तिमा खालिदा जिया साँझ ८ बजे गुलशन हाउसबाट शाहजलाल अन्तर्राष्ट्रिय विमानस्थलतर्फ प्रस्थान गरेको उल्लेख गरिएको छ ।

लण्डन पुगेपछि उनलाई सिधै लण्डनको क्लिनिकमा भर्ना गरिने छ ।

बंगला सेवाका अनुसार डाक्टरको अनुरोधमा उनलाई अमेरिकाको जोन हप्किन्स युनिभर्सिटी अस्पतालमा पनि उपचारका लागि लैजान सकिन्छ ।

खालिदा जिया कलेजो सिरोसिस, मुटु र मृगौला सम्बन्धी रोगबाट पीडित छिन् ।

बंगलादेशमा शेख हसिनाको सरकार पतन भएपछि खालिदा जिया जेलबाट रिहा भएकी हुन् । उनी भ्रष्टाचारको आरोपमा जेल परेकी थिइन् । उनलाई १७ वर्षको जेल सजाय सुनाइएको थियो ।