काठमाडौं। मधेश केन्द्रित राजनीतिक दलका नेताहरुले एकताबद्ध भएर मधेशी जनताको अधिकार स्थापित गर्न केन्द्रित हुने बताएका छन्।

गजेन्द्र नारायण सिंहको २४ औं स्मृति दिवसका अवसरमा गजेन्द्र नारायण सिंह अध्ययन प्रतिष्ठानले बिहीबार काठमाडौंमा आयोजना गरेको कार्यक्रममा उनीहरुले मधेशको मुद्दालाई सशक्त रुपमा अघि बढाउन एकताबद्ध भएर जाने बताएका हुन्।

राष्ट्रिय मुक्ति पार्टी, नेपालका अध्यक्ष राजेन्द्र महतोले गजेन्द्र नारायण सिंहलगायतका अग्रज नेताहरुको अभियान अझै पनि पुरा हुन नसकेकाले अब आफूहरु मिलेर सबैलाई अधिकार र पहिचान दिएरै छाड्ने बताए। उनले संविधान कुनै एक पार्टी वा व्यक्तिको नभएकाले समग्र देशको संविधान बनाउने गरि मुद्दा मिल्नेहरु एक हुनुपर्ने धारणा राखे।

त्यस्तै जनता समाजवादी पार्टी, नेपालका नेता राजकिशोर यादवले संविधानले सबै जनताको प्रतिनिधित्व गर्न नसकेकाले अब सर्वस्वीकार्य हुने गरि संशोधन गर्न अघि बढ्नुपर्ने उल्लेख गरे। संविधान संशोधनको सवालमा चलखेल गरेर भएका उपलब्धि हरण गर्ने र देशलाई गलत बाटोमा लैजान सक्ने चिन्ताका साथ मधेशकेन्द्रीत दलहरु एक भएर खबरदारी गर्ने उनले बताए।

त्यस्तै जनता प्रगतिशील पार्टीका अध्यक्ष हृदयेश त्रिपाठीले मधेश केन्द्रीत दलहरु यसअघि पटक पटक स्वार्थका कारण विभाजन हुनु दुःखद भएपनि अब समाज मुद्दालाई अघि बढाउन एक भएर अघि बढ्ने जिकिर गरे। उनले मधेश केन्द्रित राजनीतिक दलबीच आगामी सोमबारसम्म छलफल गरेर समान एजेण्डा बनाउने बताए।

त्यस्तै अन्य दलका नेताहरुपनि मधेशका मुद्दाहरुलाई अघि बढाउनका लागि एकताबद्ध भएर अघि बढ्नुपर्नेमा जोड दिएका थिए।