काठमाडौं । राष्ट्रिय प्रजातन्त्र पार्टीका अध्यक्ष राजेन्द्र लिङदेनले मुलुकमा भ्रष्टचार ब्याप्त रहेको जनाएका छन्।

प्रधानमन्त्री केपी शर्मा ओलीले सूचना नपाएको जनाउँदै अध्यक्ष लिङदेनले उनकै वरीपरीका मानिसले भ्रष्टचार गरिरहेको बताएका हुन्।

‘प्रधानमन्त्रीको माताहातमा राजश्व विभाग ल्याइएपछि ब्यापारीलाई छापा हान्ने अनि बार्गेनिङ गर्ने काम भइरहेको छ। यो प्रधानमन्त्रीले थाहा पाउनुपर्छ कि उहाँले नियुक्त गरेका ब्यक्तिहरूले नै बार्गेनिङ गरिरहेका छन्,’ उनले भने, ‘तपाईंले भ्रष्टाचार गर्नुभएको छ कि छैन मलाई त्यो थाहा छैन। तर, तपाईंको रिपरिका मानिसहरूले भ्रष्टाचार गरिरहेका छन्, भ्रष्टाचार चरम रुपमा छ।’

लिङ्देनले प्रधानमन्त्रीको वरिपरिका मानिसहरू भ्रष्टाचार र उठ्ती-पुठ्तीमा संलग्न रहेको बताए। उनले निर्माण व्यवसायीलाई सरकारले दिने भुक्तानीमा समेत रकम उठाइरहेको बताए।

लिङ्देनले प्रधानमन्त्री अन्तर्गतको राजश्व अनुसन्धान विभागले व्यापारीलाई सताएर पैसा उठाइरहेको बताए।

‘कुनै अरू नेतालाई नभन्नु है दु:ख पाइएला, व्यापारीलाई सताएर पैसा उठाएको कुरा सबैलाई थाहा छ,’ उनले भने, ‘अहिले कुन व्यापारीको फर्ममा छापा मार्‍यो भने बिल नमिलेको सामान छैन होला।’

बोर्डरबाट तस्करीको सामान छोडिने र नेपालपट्टी आएपछि छापा मारेर अनि सल्लाह गर्न आउ भन्ने अहिले पनि भइरहेको लिङ्देनले बताए।

‘प्रधानमन्त्रीका मान्छे ६ महिने कार्यकालमा विभिन्न पदहरूमा करोड-करोड अफर गरिरहेका छन्। प्रधानमन्त्रीको वरिपरिकाले गरिरहेका छन,’ उनले भने।

उनले मुलुकमा सरकार भएको अनुभूति नै नभएको बताए। उनले निराश जनलाई आशा जगाउन, रोजगारी सिर्जनाका निम्ति सरकारले के गर्‍यो? भन्दै प्रश्न गरे।

‘देशमा विदेशी मुद्रा सञ्चिति व्यापाक छ, भाइ छोरा बेचेर आएको पैसा होइन त्यो?,’ उनले भने, ‘त्यसरी आएको पैसा पनि खर्च गर्न सकेको छैन भनुम् न। कांग्रेस-एमाले ठूला पार्टीले बनाएको सरकार सुध्रियोस्।’