काठमाडौं। राजधानीमा जारी त्रिकोणात्मक महिला टी२० अन्तर्राष्ट्रिय सिरिजअन्तर्गत आज भएको दोस्रो खेलमा थाइल्याण्डसँग नेदरल्याण्ड्स पराजित भएको छ।

कीर्तिपुरस्थित त्रिवि मैदानमा थाइल्याण्डले नेदरल्याण्ड्सलाई आठ विकेटले पराजित गरेको हो। नेदरल्याण्ड्सले दिएको १२३ रनको लक्ष्य पछ्याएको थाइल्याण्डले १८ ओभरमा दुई विकेट गुमाएर पूरा गर्‍याे। थाइल्याण्डका लागि नान्नापत कोन्चारोइनकाइले ५० बलमा पाँच चौका प्रहार गर्दै नटआउट ५६ रन जोडिन्।

त्यसअघि टस जितेर पहिले ब्याटिङ गरेको नेदरल्याण्ड्सले निर्धारित २० ओभरमा छ विकेटको क्षतिमा १२२ रनको योगफल बनाएको थियो। नेदरल्याण्ड्सका लागि कप्तान बाकेटे डी लिडेले ५२ रन जोडिन्। त्यस्तै आरिस विलिङले २८ रन जोडिन्। बलिङमा थाइल्याण्डकी पुत्थावोङले दुई विकेट लिइन्।

सिरिजको तेस्रो खेलमा भोलि शनिबार नेपाल र थाइल्याण्डबीच प्रतिस्पर्धा हुनेछ।