फिक्कल (इलाम)। दीपेन्द्र शिखर फुटबल क्लब इलामले जिल्लाको माङसेबुङ गाउँपालिकामा सञ्चालित १५औँ संस्करणको पवित्रहाङमा गोल्डकप महिला फुटबल प्रतियोगिताको उपाधि जितेको छ।

आज प्रस्तावित आत्मानन्द रङ्शालामा भएको फाइनल खेलमा कनकाई नगरपालिका झापालाई १–० गोलको अन्तरमा रोक्दै दीपेन्द्र शिखरले उपाधि जितेको हो। सोस्तिमा विश्वकर्माले खेलको ४५औँ मिनेटमा गरेको एकमात्र गोल नै उपाधिका लागि निर्णायक बनेको थियो।

सुरुवाती अग्रतासँगै रक्षात्मक खेल खेलेको दीपेन्द्र शिखर उपाधि पाउन सफल भयो। उता कनकाईले खेलको उत्तरार्धमा पाएको केही अवसरलाई सदुपयोग गर्न नसक्दा उपविजेतामा चित्त बुझाउन बाध्य बन्यो।

उपाधिसँगै विजेता दीपेन्द्र शिखरले नगद रु तीन लाख एक सय ६९ सहित ट्रफी हात पा¥यो। उपविजेता बनेको कनकाईले नगद रु दुई लाख एक सय ६९ मा चित्त बुझायो।

फाइनल खेलको उत्कृष्ट खेलाडी विजेता दीपेन्द्र शिखरकी सोस्तिमा विश्वकर्मा घोषित हुँदै नगद रु पाँच हजार ६९ प्राप्त गरिन्। प्रतियोगिताको उत्कृष्ट गोलकिपर विजेता दीपेन्द्र शिखरकी झरना नरकोटी, उत्कृष्ट डिफेन्डर दीपेन्द्र शिखरकी सजिना कोइराला, उदयीमान खेलाडी ताप्लेजुङ फुटबल संघकी प्रजिता राई र सर्वाधिक गोलकर्ता उपविजेता कनकाईकी समीक्षा मगर (५ गोल) घोषित भइन्।

उनीहरूले जनही नगद रू पाँच हजार प्राप्त गरे आयोजक आत्मा–पवित्र खेलकुद समिति अध्यक्ष मनकुमार आङबुहाङले जानकारी दि। विजेता र उपविजेता टिम र खेलाडीलाई माङसेबुङ गाउँपालिका उपाध्यक्ष विनोदकुमार नेम्बाङले पुरस्कार हस्तान्तरण गरे ।

स्थानीय धर्मगुरु आत्मानन्द लिङ्देन पत्नी पवित्रहाङमा साँवा (लिङदेन) को ६९औँ जन्मोत्सवको अवसरमा माघ २५ गतेदेखि सञ्चालित प्रतियोगितामा इलाम, पाँचथर, ताप्लेजुङ, झापा, मोरङ र भारत दार्जिलिङका गरी ८ महिला टोलिको सहभागिता थियो।