काठमाडौं । नेपाली फिल्म ’दर्पण छायाँ २’ मा देखिएका अभिनेता पुष्प खड्का र अभिनेत्री सहारा कार्कीको जोडी पुनः एक पटक म्यूजिक भिडियोमा देखिएका छन्।

गायक भुवन श्रेष्ठ र मेलिना राईको स्वर रहेको गीत ‘सर्माइ भागेर’ को म्युजिक भिडियोमा जोडीलाई निर्देशक फिरोज तिमिल्सेनाले एकसाथ प्रस्तुत गरेका छन्।

काठमाडौंस्थित जमलमा रहेको विश्वज्योति सिनेप्लेक्समा आयोजित पत्रकार सम्मेलनमा निर्देशक तिमिल्सेनाले गीत सुनेपछि यसलाई भिडियोमा ल्याउने आइडिया आएको बताए।

उनले भने,‘म प्रवासमा रहेतापनि नेपाली गीतसङ्गीतसँग टाढिन सकेको छैन। हामी एउटा ग्रुप बनाएर बेलाबखतमा गाउने र प्राक्टिस गर्नेगर्छौं। सोही क्रममा साथी भुवनले गीत सुनाउनु भएपछि यसलाई नेपाल आएर भिडियो बनाएर सार्वजनिक गर्ने सल्लाह भएको थियो। आज सोही अनुसार गीत र भिडिओ सार्वजनिक गरेका छौं।’

उनले गीत निकै कर्णप्रिय रहेको भन्दै भिडियो पनि सक्दो मेहनत गरेर तयार गरेको बताए। कुलेखानी र आसपासका रमणीय दृश्यमा छायांकन गरिएको गीतमा अभिनेता पुष्प खड्का, अभिनेत्री सहारा कार्की, गीता अधिकारी लगायतका कलाकारले अभिनय गरेका छन्। अभिनेता पुष्पले गीत नसुन्दै आफूले काम गर्ने सहमति दिएको बताए।

उनले भने,‘फिरोज र सहारालाई मैले दर्पण छायाँमा नै भेटेको हो। सुरुवाती दिनमा भेटिएर बसेको मित्रता अहिले पनि उस्तै छ। अहिले पुनः एकसाथ काम गर्न पाउँदा मैले पुराना दिनलाई स्मरण गरें। गीत पनि निकै मिठो छ, हामीले अडियोलाई न्याय दिने किसिमको काम गरेका छौं, जस्तो लागेको छ।’

आठ वर्षपछि पुनः गीतमा देखिन पाउँदा आफू उत्साहित रहेको पुष्पले बताए। अभिनेत्री कार्कीले पहिलो फिल्ममा काम गर्दा भेटेको पुष्पमा उही सरलता र मेहनतीपन देखिएको भन्दै प्रसंसा गरिन्।

उनले भनिन्,‘पहिलो फिल्मदेखि अहिलेसम्म पनि पुष्पसँग काम गर्दा कम्फर्ट फिल हुन्छ। उ अहिले पनि उस्तै लगनशील छ। उसको मेहनतले म जस्तो कलाकारलाई काम गर्ने उर्जा मिल्छ। यो गीत मैले भुवनजीमार्फत सुनेकी थिएँ। मलाइ मन परेको हो, अहिले काम गर्न पाउँदा खुसी लागेको छ।’

अभिनेत्री कार्कीले अभिनयलाई म्युजिक भिडिओ र चलचित्रमार्फत निरन्तरता दिने बताइन। भिडिओमा अर्जुन तिवारीले छायांकन, विकास दाहालले सम्पादन, राजेन्द्र मोक्तानले रङग संयोजन, ज्योति केसीले शृंगार गरेका छन्।

गीतक सार्वजनिक गर्न आयोजना गरिएको पत्रकार सम्मेलनमा निर्देशक नवल नेपाल, गायक सनुप पौडेल, र्यपार हाकिम गुरुङ, प्रोजेक्ट हेद कुवेर डंगोल लगायत उपस्थित थिए।