काठमाडौं । गाजा पट्टीमा सबै मानवीय सहायताको प्रवेशमा रोक लगाएकोमा धेरै अरब देशहरू र संयुक्त राष्ट्र संघले इजरायलको निन्दा गरेका छन्।

इजिप्ट र कतारले आइतबार इजरायलको कदम युद्धविराम सम्झौताको उल्लङ्घन भएको बताएका छन् भने संयुक्त राष्ट्रसंघका मानवीय प्रमुख टम फ्लेचरले यसलाई “चिन्ताजनक” भनेका छन्।

इजरायली प्रधानमन्त्री बेन्जामिन नेतान्याहूले हमासले मानवीय सहायता आपूर्तिबाट सामानहरू चोरिरहेको र “आफ्नो आतंकवादी मेसिनरीलाई इन्धन दिन” प्रयोग गरिरहेकोले आफ्नो देशले यो कदम चालेको बताएका छन् ।

इजरायलले गाजामा युद्धविराम बढाउने अमेरिकी प्रस्तावलाई हमासले अस्वीकार गरेको आरोप पनि लगाएको छ।

यसैबीच, हमासका प्रवक्ताले इजरायलको नाकाबन्दी “सस्तो ब्ल्याकमेल” र युद्धविराम सम्झौताको विरुद्ध भएको बताए।

आइतबार एक विज्ञप्तिमा कतारको विदेश मन्त्रालयले पनि इजरायलको निर्णयको कडा निन्दा गरेको छ र यसलाई युद्धविराम सम्झौता र अन्तर्राष्ट्रिय मानवीय कानूनको स्पष्ट उल्लङ्घन भनेको छ।

एएफपी समाचार एजेन्सीका अनुसार इजिप्टमा विदेश मन्त्रालयले इजरायललाई “प्यालेस्टिनी जनता विरुद्ध हतियार” को रूपमा भोकमरी प्रयोग गरेको आरोप लगाएको छ।

साउदी अरेबियाले पनि इजरायलको यो कदमको निन्दा गरेको छ।