काठमाडौं । अमेरिकी राष्ट्रपति डोनाल्ड ट्रम्पले आइतबार २६१ भेनेजुएला आप्रवासीहरूलाई एल साल्भाडोरको सुपरम्याक्स जेलमा पठाएका छन्। अमेरिकाले ‘एलियन एनिमी एक्ट’ अन्तर्गत यो कारबाही गरेको हो जसमा उनीहरूलाई लागूपदार्थ बेच्ने गिरोहका सदस्य भनिएको छ।

एल साल्भाडोरका राष्ट्रपति नायिब बुकेलेले सामाजिक सञ्जालमा भनेका छन् ‘भेनेजुएलाको गिरोह ‘ट्रेन डे अरागुआ’ का २३८ सदस्य र अन्तर्राष्ट्रिय गिरोह एमएस-१३ का २३ सदस्य आइतबार बिहान यहाँ आइपुगेका छन्।’

यी मानिसहरूलाई देश निकाला गर्ने आदेशलाई अमेरिकी अदालतले रोक लगाएको थियो। यसपछि पनि अमेरिकाले यी मानिसहरूलाई देश निकाला गर्यो। ट्रम्प प्रशासनका अधिकारीहरूका अनुसार अदालतको आदेश आउँदासम्म विमानहरू पहिले नै उडिसकेका थिए।

राष्ट्रपति नायिब बुकेलेले यी व्यक्तिहरू एल साल्भाडोर पुगेको भिडियो सामाजिक सञ्जालमा सेयर गरेका छन्। यसमा, हथकडी लगाएका मानिसहरूलाई उडानबाट ओरालिएको छ र जबरजस्ती जेल लगिएको छ। यसबाहेक, राष्ट्रपति कार्यालयले यी व्यक्तिहरूलाई जेलमा स्थानान्तरण गर्दाका केही तस्बिरहरू पनि जारी गरेको छ।

जिल्ला न्यायाधीश जेम्स ई. बोसबर्गले शनिबार भेनेजुएलाका नागरिकहरूको देश निकालालाई अस्थायी रूपमा रोक्न आदेश जारी गरेका थिए । सरकारी वकिलहरूले उनलाई बताएअनुसार त्यतिबेला दुईवटा विमान उडिसकेका थिए। यी मध्ये एउटा एल साल्भाडोर र अर्को होन्डुरसको लागि प्रस्थान गरेको थियो ।

त्यसपछि न्यायाधीशले दुवै विमान फिर्ता बोलाउने आदेश पनि दिए तर आफ्नो लिखित आदेशमा त्यसलाई समावेश गरेनन्। जसका कारण प्रशासनले यसलाई बेवास्ता गर्यो।

ह्वाइट हाउसकी प्रेस सचिव क्यारोलिन लेभिटले आइतबार प्रशासनले कुनै पनि अदालतको आदेशलाई बेवास्ता नगरेको बताइन्। यो आदेश कानुनी रूपमा आधारहीन थियो र यो जारी हुँदासम्म, संदिग्ध आतंककारीहरूलाई संयुक्त राज्य अमेरिकाबाट पहिले नै हटाइसकिएको थियो।