काठमाडौं । अमेरिकी राष्ट्रपति डोनाल्ड ट्रम्पले आइतबार पूर्व राष्ट्रपति जो बाइडेनले आफ्नो कार्यकालको अन्तिम दिनहरूमा माफी दिएका सबै व्यक्तिहरूको आममाफी अमान्य भएको बताएका छन्।

बाइडेनले आममाफी दिएका व्यक्तिहरूमा उनका छोरा हन्टर बाइडेन पनि पर्छन्। ट्रम्पले भने- ‘पद छोड्नुभन्दा ठीक अगाडि बाइडेनले गलत तरिकाले माफी दिएका सबै व्यक्तिहरूले अब अनुसन्धानको सामना गर्नेछन्।’

ट्रम्पका अनुसार निदाइरहेका बाइडेनले राजनीतिक गुण्डाहरू र अरू धेरैलाई माफी दिए। उनलाई आफूले गर्दैछु भन्ने पनि थाहा थिएन किनकि यी कागजातहरूमा उनले आफैं हस्ताक्षर गरेका थिएनन् । उनको हस्ताक्षर अटोपेनले गरिएको थियो।

अटोपेन एउटा मेसिन हो जसले मानव हस्ताक्षरको ठ्याक्कै प्रतिलिपि बनाउँछ। यो विशेष गरी आधिकारिक कागजातहरूमा हस्ताक्षर गर्नको लागि डिजाइन गरिएको हो। अमेरिकी राष्ट्रपतिहरूले दशकौंदेखि अटोपेन प्रयोग गर्दै आएका छन्।

राष्ट्रपति पद छोड्नुअघि जो बाइडेनले आफ्ना छोरा हन्टर बाइडेनको सजाय माफी दिएका थिए। हन्टर बाइडेनमाथि अवैध रूपमा बन्दुक राखेको र कर छली गरेको आरोप लागेको थियो।

बाइडेनले भनेका थिए – ‘मलाई कानून र व्यवस्थामा पूर्ण विश्वास छ, तर राजनीतिले यसलाई फोहोर बनाएको छ। हन्टरको केस पछ्याउने कुनै पनि समझदार व्यक्तिलाई थाहा हुनेछ कि उनलाई मेरो छोरा भएको कारणले मात्र निशाना बनाइएको थियो।’

हन्टरलाई गत वर्ष डिसेम्बर ४ मा सजाय सुनाइने तय भएको थियो। गैरकानूनी रूपमा बन्दुक खरिद गरेको अपराधको अधिकतम सजाय २५ वर्षको जेल सजाय हुन सक्थ्यो । तर सजाय सुनाउनुभन्दा दुई दिन अघि उनका बुबा बाइडेनले उनलाई बचाउन आफ्नो राष्ट्रपतिको शक्ति प्रयोग गरे।

अमेरिकाका राष्ट्रपतिसँग संघीय अपराधहरूसँग सम्बन्धित सजाय माफी दिने वा घटाउने संवैधानिक अधिकार छ। अमेरिकी सर्वोच्च अदालतले यो शक्ति कुनै सीमा बिना दिइएको र कांग्रेस (संसद) ले यसलाई प्रतिबन्धित गर्न नसक्ने ठहर गरेको छ।

माफी एक कार्यकारी अधिकार हो र यो विवेकाधिकार हो जसको अर्थ राष्ट्रपति आफ्नो माफीको लागि जवाफदेही हुँदैनन् र माफी जारी गर्नुको लागि कुनै कारण दिन आवश्यक पर्दैन।