काठमाडौँ । स्पेनिस ला लिगामा एटलेटिको मड्रिडले लगातार दोस्रो जित हासिल गरेको छ । गएराती सम्पन्न खेलमा एटलेटिकोले लेगानेजलाई १-० गोल अन्तरले पराजित गरेको हो । एटलेटिकोको जितमा भिटोलोले खेलको एक मात्र गोल गरेका हुन् । पहिलो हाफ बिना कुनै गोल सकिएको खेलमा भिटोलोले खेलको ७१औ मिनेटमा गोल गरेका हुन् । यस गोललाई युवा खेलाडी जोअओं फेलिक्सले असिस्ट गरेका थिए ।

योसँगै एटलेटिकोले ला लिगाका दुवै खेल जितेर उत्कृष्ट सुरुवात गरेको छ । दुई ठुला क्लब रियल म्याड्रिड र बार्सिलोनाले सिजनको सुरुमै संघर्ष गरिरहेका बेला एटलेटिकोले उत्कृष्ट सुरुवात गरेको हो । अब लिगमा एटलेटिकोले अर्को खेल आगामी आइतबार एइबरविरुद्ध खेल्ने छ भने लेगानेजले रियल बेटिसको सामना गर्ने छ ।