काठमाडौं । काठमाडौं महानगरपालिकाका मेयर बालेन शाहले बुधबार प्रदर्शनमा उत्रिएका शिक्षकहरूको शान्तिपूर्ण रहेको भन्दै धन्यवाद व्यक्त गरेका छन्।

कुनै फोहोर नगरी र नभत्काइ आन्दोलन गरेकोको भन्दै मेयर शाहले खुसी व्यक्त गरेका हुन्। ‘हामीले जरिवाना खोजेका होइनौं, चेतना खोजेको हो,’ उनले सामाजिक सञ्जालमा लेखेका छन्।

सबै मिलेर चेतनशील समाज निर्माण गर्नुपर्ने मेयर बालेनको भनाइ छ। काठमाडौंमा प्रदर्शनका क्रममा देखिएको दृश्य आफ्ना विद्यार्थीसमक्ष पनि लागू गर्न उनले आग्रह गरेका छन्।

‘सार्वजनिक सम्पति पनि आफ्नै सम्पति हो भनेर त्यसलाई जोगाउने चेतनशील समाजको निर्माण गर्न खोजेको हो। यहि शिक्षा तपाईले आफ्नो विद्यार्थीहरूलाई पनि दिनुहोला। हामी सबै मिलेर चेतनशील समाजको निर्माण गरौँ। तपाईंहरू त झन् शिक्षक हुनुहुन्छ, तपाईंहरूको त झन् ठुलो जिम्मेवारी र भूमिका छ,’ उनले भनेका छन्।

उनले विद्यार्थीको पढाइ नबिगारी कार्यक्रम गर्न पनि शिक्षकहरूलाई आग्रह गरेका छन्। ‘गाउँ गाउँमा सिंहदरबार भन्ने त नारा मात्र भयो। आशा छ एकदिन आफ्नो अधिकारको लागि काठमाडौ धाइरहनु नपरोस्,’ उनको आग्रह छ।