एजेन्सी। बलिउडकी चर्चित अभिनेत्री श्रीदेवीको मैनको मूर्ति सिंगापुरको म्याडम तुसाद संग्रहालयमा स्थापित गरिएको छ । आज यो मूर्तिको श्रीदेवीका पति बोनी कपूर, छोरीहरु जाह्नवी कपूर र खुसी कपूरले सामूहिक रुपमा अनावरण गरे । मूर्ति अनावरण गर्ने क्रममा आफ्नी आमाको मूर्ति देखेपछि केही बेर जाह्नवी हेरेको हेर्यै भइन् । फ्यानहरुले भने श्रीदेवीको मूर्तिका विषयमा असन्तुष्टि जनाएका छन् ।

श्रीदेवीको यो मूर्ति उनको फिल्म मिस्टर इण्डियाको लुकबाट प्रेरित छ । यो मूर्तिका तस्वीरहरु सामाजिक संजालमा भाइरल भइरहेको छ । सामाजिक संजालमा श्रीदेवीको मूर्तिलाई लिएर बहस सुरु भएको छ । एकातर्फ फ्यानहरु उनको मूर्ति बनेकोमा खुसी छन् भने अर्कोतर्फ केही फ्यानहरु निराश छन् । उनीहरुका अनुसार मूर्ति श्रीदेवीजस्तो देखिँदैन । एक युजरले लेखेका छन् ‘केवल कपडा र फिगरमा मात्र ध्यान दिइएको छ । अनुहार त श्रीदेवीको जस्तो छँदै छैन ।’ अन्य धेरै युजरले पनि मूर्ति श्रीदेवीजस्तो नदेखिएको टिप्पणी गरेका छन् ।