काठमाडौं। श्रीलंकामा जारी एसीसी यू–१९ एसिया कप अन्तर्गत श्रीलंका विरुद्धको खेलको अघिल्लो बिहीबार दिन नेपाली क्रिकेट टिमका पूर्व प्रशिक्षक रोयलुक डायसले नेपाली युवा खेलाडीलाई ब्याटिङ टिप्स दिएका छन् ।

श्रीलंकाको कोलम्बोमा शुक्रबार विहान सवा १० बजेबाट हुने खेलमा नेपालले घरेलु टिम श्रीलंकाविरुद्ध खेल्दैछ । हाल श्रीलंका ए टिमका प्रशिक्षक समेत रहेका डायसले नेपाली खेलाडीसँगको केहि बेरको भेटमा श्रीलंकन पिचमा कसरी खेल्ने भन्ने ब्याटिङ टिप्स दिएका हुन ।

नेपाली क्रिकेटलाई लामो समय सर्विस गरेका डायस प्रशिक्षक हुँदा विनोद दास खेलाडीका रुपमा थिए । हाल यू–१९ टिमको प्रशिक्षक रहेका दाससँग डायसले भेटेपनि खेलाडीमा पनि केहि उत्साह थपिएको छ ।

नेपाली टिमले हाइ पर्फमेन्स एकेडेमी रहेको स्थानमा नै प्रशिक्षण गरेका थिए । सोहि समय डायस केहि समयका लागि नेपाली टिमलाई भेट्न आएका थिए । छोटो कुराकानीमा उनले खेलाडीलाई टिप्स दिनुका साथै नेपाली क्रिकेटका बारेमा पनि जानकारी लिएका थिए ।