काठमाडौं । एनसेल कर छलीको विषयमा राष्ट्रिय प्रजातन्त्र पार्टीको आज पदाधिकारी बैठकमा विस्तृत छलफल भएको छ।

उक्त विषयमा पार्टीले पूर्व गृह एवं कानूनमन्त्री निरञ्जन थापालाई विस्तृत अध्ययन गर्न जिम्मेवारी दिएको थियो।

पदाधिकारी बैठकमा पार्टीका सल्लाहकार समितिका अध्यक्षसमेत रहेका थापाले एनसेल कर छली विषयमा विस्तृत विवरण प्रस्तुत गरेको राप्रपा सहायक महामन्त्री राजाराम बर्तौलाले जानकारी दिए।

‘यस विषयलाई राप्रपाले संसद्देखि सडकसम्म लैजान्छ, राप्रपाले संघर्ष गर्छ’, उनले भने। पार्टी अध्यक्ष कमल थापाको अध्यक्षतामा बसेको उक्त बैठकमा पदाधिकारीहरुको उपस्थिति रहेको थियो।

कम्युनिष्टको एजेण्डा बोक्दै काङ्ग्रेस

राष्ट्रिय प्रजातन्त्र पार्टीका अध्यक्ष कमल थापाले कम्युनिष्टको एजेण्डा बोक्ने काङ्ग्रेस मुलुकको विकल्प बन्न नसक्ने बताएका छन्।

पार्टीको काठमाडौँ जिल्लास्तरीय प्रशिक्षक प्रशिक्षण कार्यक्रममा उनले असफल नीति र बाटोमा परिवर्तन आवश्यक भएको चर्चा गर्दै पार्टी र व्यक्ति परिवर्तन होइन नीति र बाटो परिवर्तन जरुरी भएको विचार व्यक्त गरे।

फरक फरक विचारले प्रजातन्त्रलाई मजबुत बनाउने भन्दै अध्यक्ष थापाले राप्रपा राष्ट्रवादी प्रजातान्त्रिक शक्ति भएको बताए।

कार्यक्रममा राप्रपा नेता भुवन पाठक, प्राडा जयन्तनाथ खनाल, रमानन्द न्यौपाने, आशा लामालगायतले प्रशिक्षण दिएको सहायक महामन्त्री राजाराम बर्तौलाले जानकारी दिए।रासस