काठमाडौं । अभिनेता विराज भट्ट अभिनित तथा डेब्यू निर्देशित चलचित्र ‘साङ्लो’को अफिसियल पोस्टर र नयाँ प्रदर्शन मिति सार्वजनिक गरिएको छ । सार्वजनिक पोष्टरमा विराज स्वयंम फिचर्ड छन्। उनलाई एक्सन लुकमा देखाइएको छ।

त्यस्तै पोष्टरमा चलचित्रको प्रदर्शन मिति फागुन ९ गते उल्लेख छ। चलचित्र महाशिवरात्रीको अवसर देशब्यापी प्रदर्शनमा आउने भएको हो। चलचित्रलाई विराज भट्ट र तेजबहादुर खड्काले निर्माण गरेका हुन्।

कुनै समय एक्सन अभिनेताको छवि बनाएका विराजको तीन वर्षयता कुनै चलचित्र प्रदर्शनमा आएका छैनन्। त्यसैले ‘साङ्लो’लाई विराजको कमब्याक चलचित्रका रुपमा हेरिएको छ। चलचित्रले आफ्नो पुरानो स्टारडम फिर्ता गर्नेमा विराज विश्वस्त देखिएका छन्।

चलचित्रमा पूर्व मिस नेपाल निकिता चाण्डकसँग विराजले जोडी बाँधेका छन्। साथमा कामेश्वर चौरासिया, जयनन्द लामा, आर.पि. पन्तलगायतका कलाकारहरुले चलचित्रमा अभिनय गरेका छन्।