काठमाडौं। आउँदो मंसिर ६ गतेबाट प्रदर्शनमा आउने फिल्म ‘च च हुई’को दोस्रो गीत सार्वजनिक गरिएको छ। आईतबार फिल्म निर्माण युनिटले दसैंको अवसर पारी ‘जवानी’बोलको गीत सार्वजनिक गरेको हो ।

सार्वजनिक आइटम गीतमा आर्यन सिग्देल र अलिशा शर्मा देखिएकी छिन् ।

केही दिन अगाडि बालाजुस्थित एनएफडिसीमा भब्य सेट लगाएर गीतको छायाँकन गरिएको थियो। शिशिर खातीको कोरियोग्राफीमा तयार भएको गीतलाई आकर्षक देखाउन निर्माण पक्षले कुनै सम्झौता गरेको छैन । गीतमा आर्यन र अलिशाको ग्ल्यामर अवतारलाई समेटिएको छ।

गीतमा फिल्मका निर्देशक साम्तेन भुटिया र विनय सापकोटाको शब्द रहेको छ भने यसलाई रोशन थापाले संगीत भरेका हुन्। ‘लुट’को ‘उध्रेको चोली‘ र ‘जात्रा’को ‘नोट नोट’ जस्ता गीत तयार पारेर चर्चामा आएका रोशनले यस गीतमा स्वर पनि दिएका छन्। उनलाई गायनमा सुमन गुरुङले साथ दिएका छन्।

फिल्ममा निर्देशन र सम्पादन साम्तेनको रहेको छ ।

रोमान्टिक कमेडी जनरामा निर्माण भएको फिल्ममा आर्यनसँगै भोलाराज सापकोटा, मिरुना मगर, माओत्से गुरुङ, पुस्कर गुरुङ, बबिता मल्ललगायतको अभिनय छ ।

फिल्मलाई अमृत घोले लामाले निर्माण गरेका हुन्। सुशन प्रजापतिले फिल्मको छायांकन गरेका हुन्।