काठमाडौं । भेनेजुयलाको काराकास शहरमा आयोजना हुने अन्तराष्ट्रिय सौदर्य प्रतियोगिता ‘मिस ग्राण्ड इन्टरनेशनल २०१९’मा नेपालको प्रतिनिधित्व निशा पाठकले गर्ने भएकी छन्।

९ देखि २६ अक्टोबरसम्म आयोजना हुने प्रतियोगितामा निशा नेपाली कलासंस्कृति सहित प्रतियोगितामा सहभागी हुन लागेकी हुन्। उनी नेपालको एक्लो प्रतिनिधि हुन्।

उक्त प्रतियोगितामा नेपालको प्रतिधित्व गर्न लागेकी निशालाई कस्मो ट्रेडिङ प्रालीले नगद ५० हजार समेत सहयोग गरेको छ । बुधबार राजधानीमा एक कार्यक्रमका बिच कस्मो ट्रेडिङका अध्यक्ष रेशम लामाले निशालाई रकम हस्तान्तरण गरे।

नेपालको प्रतिनिधित्व गरेर अन्तराष्ट्रिय कार्यक्रमा सहभागी हुन लागेको निशालाई हौसला प्रदान आफुले साना सहयोग गरेको कस्मो ट्रेडिङका अध्यक्ष रेशम लामाले बताए।

वलिउड शोडाउन नेपाल नामक संस्थाले निशालाई ‘मिस ग्राण्ड नेपाल २०१९’को उपाधि सहित ‘मिस ग्राण्ड इन्टरनेशनल २०१९’ मा पठाउन लागेको हो।

८० देशका सुन्दरीहरुको सहभागीता रहने प्रतियोगितामा निशाले भिजिट नेपाल २०२० को प्रचार गर्दै बिश्वका प्रतिनिधिलाई नेपाल भ्रमणको निम्तो समेत दिनेछिन्।

इप्लानेट प्रालीको संयोजनमा प्रतियोगितामा सहभागी हुन लागेकी निशाले नेपाली कलासंस्कृति झल्कने बिभिन्न भोषभुसा सहितको नृत्य समेत कार्यक्रममा प्रस्तुत गर्ने वलिउड शोडाउनका निर्देशक सुरेस तामाङले जानकारी दिए।

प्रतियोगिताका लागि निशाले बिभिन्न प्रशिक्षण समेत लिएकी छन् । २२ बर्षीया निशासँग मिस हेरिटेज इन्टरनेशनल २०१५, मिष्टर एण्ड मिस कल्चर वल्र्ड २०१९ लगायत सौदर्य प्रतियोगिताको समेत अनुभव रहेको छ।

नेपालका लागि शिर्ष उपाधि भित्र्याउने लक्ष्यसहितआफु प्रतियोगितामा सहभागी हुन लागेको निशाले बताइन्। ‘नेपाल चिनाउन मेरो लागि यो एउटा अवसर हो । सफल भएर फर्किने छु,’ उनले भनिन्।