काठमाडौं । मकवानपुरको हेटौँडा उपमहानगरपालिका १ चाइनागेटस्थित पूर्वपश्चिम सडकमा ना ८ ख ३८७२ नम्बरको ट्याङकरले ना ५६ प ३९३५ नम्बरको मोटरसाकललाई शुक्रबार बिहान ठक्कर दिंदा मोटरसाइकलमा सवार ३५ वर्षीया सीता न्यौपानेको घटनास्थलमै मृत्यु भएको छ।

दुर्घटनामा घाइते भएका मोटरसाइकल चालक सोही ठाउँ बस्ने ४५ वर्षीय शशी न्यौपानेको हेटौंडा अस्पतालमा उपचार भैरहेको छ। ट्याङकर र चालकलाई प्रहरीले नियन्त्रणमा लिएको छ।

मोरङ, सुन्दरहरैंचा नगरपालिका ७ ठडिया चोकस्थित पूर्वपश्चिम राजमार्गमा को १ ज ३१६८ नम्बरको पिकअप भेन र को ३५ प १४२२ नम्बरको मोटरसाइकल शुक्रवार बिहान एकआपसमा ठक्कर खाई दुर्घटना हुँदा गम्भीर घाइते भएका मोटरसाइकल चालक बेलबारी नगरपालिका २ बस्ने २० वर्षीय योगेश निरौलाको बिराटनगर न्यूरो अस्पतालमा उपचारको क्रममा मृत्यु भएको छ।

दुर्घटनामा घाइते भएका मोटरसाइकलमा सवार सोही ठाउँ बस्ने १९ वर्षीय सुसन कार्कीको सोही अस्पतालमा उपचार भइरहेको छ। यस सम्बन्धमा स्थानीय प्रहरीले आवश्यक अनुसन्धान गरिरहेको छ।