काठमाडौं। पहिलो चलचित्र ‘ए मेरो हजुर २’ हिट भएपछि सलिनमान बनियाको डिमान्ड हवात्तै बढ्यो।

चकलेटी अनुहार। सुकिलो–मुकिलो ज्यान। आकर्षक ड्रेसअप, भिन्न हेयरस्टाइल। जसलाई दर्शकले अत्याधिक रुचाए। सलिनमानले एउटै चलचित्रबाट दर्शकमाझ लोभलाग्दो क्रेज बनाए। त्यसैले पनि निर्माता/निर्देशकको नजर उनितिर पर्यो। तर, सलिनमानले लामो समय कुनै पनि चलचित्र गरेनन्।

केही समयपश्चात सलिनमानले दोस्रो चलचित्रस्वरुप ‘यात्रा’मा काम गरे। गतवर्षको चैतमा प्रदर्शनमा आएको चलचित्रले औसत व्यापार गर्यो।

त्यसयता उनी अन्य कुनै चलचित्रमा काम गरेका छैनन्। न कुनै चलचित्र साइन गरेको नै चर्चा सुनिएको छ। अहिले पनि उनलाई चलचित्रमा खेलाउन निर्माता/निर्देशकहरु लागिपरेका छन्। तर, सलिनमान चलचित्र खेल्न राजी देखिएका छैनन्।

आशालाग्दो अभिनेताका रुपमा उदाएका सलिनमानको नयाँ चलचित्र कुन? अहिले चलचित्र क्षेत्रमा चासो छ।