एजेन्सी । लेष्टर सिटीले इन्ग्लिश प्रिमियर लिग फुटबलमा जित निकालेको छ। शनिबार राति भएको खेलमा बर्नलीलाई २–१ गोल अन्तरले हराएको हो।

घरेलु मैदानमा लेष्टरलाई जित दिलाउन जेमी भर्डी र युरी टेलिमान्सले एक एक गोल गरे । बर्नलीका क्रिस वुडले एक गोल गरे । लेष्टरले सुरुवाती अग्रता उल्टाएर जित निकालेको हो ।

खेलको २६ औं मिनेटमा वुडले गोल गर्दै बर्नलीलाई अग्रता दिलाएका थिए । तर, खेलको ४५ औं मिनेटमा भर्डीले गोल गर्दै लेष्टरलाई खेलमा फर्काए ।

त्यसपछि खेलको ७४ औं मिनेटमा टेलिमान्सले गोल गर्दै लेष्टरलाई २–१ को जित दिलाए ।

जितसँगै लेष्टरले ९ खेलबाट १७ अंक जोडेको छ । लेष्टर दोस्रो स्थानको सिटी भन्दा २ अंकले पछि छ । बर्नली १२ अंक जोडेर आठौं स्थानमा छ ।

लिग अन्तर्गत अर्को खेलमा टोटेनहमले वाट्फोर्डसँग १–१ गोलको बराबरी खेल्दै अंक बाडेको छ ।

डेली अलीले गोल गरेपछि टोटेनहम हारबाट जोगिएको हो । यसअघि अब्डोउलाय डोउकोरेले गोल गर्दै वाट्फोर्डलाई अग्रता दिलाएका थिए ।