एजेन्सी । प्रिमियर लिग फुटबलमा म्यान्चेष्टर सिटीले एस्टन भिल्लालाई हराएको छ । शनिबार भएको खेलमा सिटीले घरेलु मैदानमा एस्टन भिल्लालाई ३–० ले हराएको हो ।

सिटीले जितसंगै शीर्ष स्थानको लिभरपुलमाथि दबाब बढाएको छ । उसले लिभरपुलसंगको दुरी ३ अंकमा झारेको छ ।

सिटीको जितमा रहिम स्टर्लिङ, केभिन डी ब्रुईन, गुन्डोगनले समान एक एक गोल गरे । तीनै गोल दोस्रो हाफमा सम्भव भएको थियो ।

दोस्रो हाफको पहिलो मिनेटमै स्टर्लिङले गोल गर्दै सिटीलाई अग्रता दिलाएका थिए । ६५ औ मिनेटमा ब्रुईनले सिटीको अग्रता दोब्बर पारे । गुन्डोगनले ७० औ मिनेटमा गोल गर्दै सिटीलाई ३–० को स्थितीमा पुर्याएका थिए ।

खेल सकिन तीन मिनेट अगाडी फर्नान्डिन्हो रातो कार्ड खादै मैदान बाहिरिएपछि सिटी १० खेलाडीमा सिमित बनेको थियो ।

सिटीले १० खेलबाट २२ अंक जोड्यो । शीर्ष स्थानको लिभरपुलको २५ अंक छ । एस्टन भिल्ला ११ अंक सहित १३ औ स्थानमा छ ।