एजेन्सी। आतंकवादी संगठन इस्लामिक स्टेट (आइएस)का प्रमुख अबु बकर अल बगदादीको गोप्य अड्डाको बारेमा जानकारी दिने सुराकीलाई २५ मिलियन डलर (२ अर्ब ८३ करोड नेपाली रुपैयाँ) पुरस्कार दिइनेछ । यी व्यक्ति आइएससँग जोडिएका थिए र उनैले टर्कीको सीमामा भएको अमेरिकी सेनाको अपरेशनमा सहयोग गर्दै बगदादीको हत्यामा महत्वपूर्ण भूमिका निभाएका थिए । एक अमेरिकी अखबारका अनुसार अज्ञात देशको राष्ट्रियता भएका यिनै व्यक्तिले बगदादीको पछिल्लो अड्डाको बारेमा अमेरिकी सेनालाई विस्तृत जानकारी दिएका थिए ।

अखबारका अनुसार अमेरिकी अपरेशनको क्रममा बगदादीको सिरियाली परिसरको भित्र रहेका यही भित्री सूत्रले न केवल बगदादी लुकेको ठाउँबारे बताए, यसका साथै त्यस स्थानको सही आन्तरिक नक्शा पनि उपलब्ध गराएका थिए । अखबारसँग कुरा गर्दै सिरियन डेमोक्रेटिक फोर्सेसका जनरल मजलुम आब्दीले भने ‘सुराकीले टर्कीको सीमामा स्थित आतंकवादी नेताको परिसरस्थित एक एक कोठाको सही जानकारी नक्शासमेत बताएका थिए । यसमा सुरक्षाकर्मीको संख्या, फ्लोर प्लान र सुरुङको जानकारी पनि थियो ।’

यी सुराकीलाई बगदादीमाथि राखिएको २५ मिलियन डलरको पूरै पुरस्कार दिइने सम्भावना छ । मानिएको छ कि यी त्यही व्यक्ति हुन् जसले यसै वर्ष अमेरिकालाई बगदादीले प्रयोग गरेका अण्डरवेयर र उनको रगतको नमूना उपलब्ध गराएका थिए । जसको सहयोगले अमेरिकाले बगदादीको डिएनएबारे जानकारी हालि गरेको थियो । गत शनिबार अपरेशनका क्रममा बगदादी मारिएपछि अमेरिकी सेनाले तिनै नमूनाका आधारमा बगदादीका अवशेषको पहिचान गरेको थियो ।