मुम्बई । बलिउड अभिनेता सलमान खानले आफ्नो नयाँ फिल्म दबंग–३ मा पाकिस्तानी गायक राहत फतेह अली खानले गाएको गीत हटाएको विषय अहिले चर्चाको विषय बनेको छ । यस अघि दबंग र दबंग–२ मा ‘तेरे मस्त मस्त दो नयन’ र ‘तेरे नयना दगाबाज रे’ बोलको गीत गाएका राहतले दबंग–३ मा दुई गीत गाएका थिए ।

तर भारत र पाकिस्तानबीच तनाव बढेपछि फिल्म विवादमा पर्ने डरले सलमानले राहतले गएको गीत जावेद अलीलाई गाउन लगाएको बलिउड हंगामाले उल्लेख गरेको छ । सलमानको निर्णयप्रति राहतले आफ्नो कुनै गुनासो नभएको प्रतिक्रिया दिएका छन् ।

पाकिस्तानी पत्रिका डाउनसँग कुरागर्दै राहतका म्यानेजरले राहतले दबंग–३ मा दुई गीत गाएको बताउदै दुवै गीत उत्कृष्ट बनेका भएपनि सलमानले आफ्नो देशको हितमा निर्णय लिएको बताएका छन् । दुवै देशबीच बढेको तनावका कारण फिल्मलाई विवादरहित बनाउन सलमानले यस्तो कदम चालेको र आफुहरुलाई यसमा कुनै गुनासो नभएको उनले बताए ।

सलमान खान अभिनित दबंग–३ आगामी डिसेम्बर २० मा रिलिज हुदै छ । दबंग–३ मा सलमानसँग सोनाक्षी सिन्हा र साई मंजरेकरले रोमान्स गरेका छन् भने फिल्ममा अभिनेता सुदीप, महेश मंजरेकर र अरबाज खानले अभिनय गरेका छन् । फिल्मलाई प्रभु देवाले निर्देशन गरेका छन् ।