काठमाडौं। बेलायतबाट घुम्न गएकी २१ वर्षकी युवती ग्रेस मिलानेलाई यौन सम्बन्धका क्रममा मार्ने न्यूजिल्याण्डका युवकलाई अदालतले दोषी ठहर गरेसँगै मिलानेका मातापिता अदालतमै भक्कानिए । यी युवकले ग्रेस मिलानेलाई यौन सम्बन्धकै क्रममा उग्र भएर घाँटी थिचेर मारेका थिए । त्यसपछि उनको शवलई एउटा सुटकेसमा राखेर जंगलमा लगेर गाडेका थिए ।

डेभिड मिलाने अकल्याण्ड हाइकोर्टको सिढीमै बसे र आँसुको साथमा आफ्नी छोरीलाई श्रद्धाञ्जली दिए । ग्रेसकी आमा गिलले चुपचाप आँसु पुछिन् । अदालतबाहिर आँसुले भरिएका आँखासहित डेभिड मिलानेले भने ‘ग्रेस सुन्दर, प्रतिभाशाली र मायालु छोरी थिइन् । ग्रेस हाम्री ‘सनशाइन’ थिइन् र हामी उनलाई सधैं मिस गर्नेछौं ।’

ग्रेसको हत्या गर्ने युवकलाई दोषी ठहर गर्न ३ दिनसम्म सुनुवाइ चल्यो । सुनुवाइका क्रममा उनले ग्रेस फिफ्टी शेड्स अफ ग्रे फिल्मकी फ्यान भएको र यौन सम्बन्धका क्रममा आफूलाई उग्र हुन उक्साइरहेको दावी गरेका थिए । उनले यही क्रममा ग्रेसको दुर्घटनावश मृत्यु भएको दावी गरेका थिए । उनले ग्रेसले उग्र यौन सम्बनधको आनन्द लिएको पनि दावी गरेका थिए ।

अदालतले भने ती आरोपीले ग्रेसको नभइ आफ्नै यौन आनन्दको लागि उन्मादमा अत्याधिक उग्र यौन सम्बन्ध राख्ने क्रममा ग्रेसको घाँटी थिचेको ठहर गरेको छ । उनले ग्रेसको मृत्युपछि पनि उनले पोर्न हेरेको आधारमा यस्तो निष्कर्ष निकालेको हो । उनले नियतवश नै ग्रेसको शवलाई सुटकेसमा हालेर जंगलमा गाडेको, कोठामा लागेको उनको रगत सफा गरेको र उनलाई गाड्नुभन्दा अगाडी अर्की युवतीसँग डेटिङमा गएको आधारमा अदालतले उनलाई दोषी ठहर गरेको हो । उनलाई आगामी फेब्रुअरीमा सजाय सुनाइनेछ ।

डेभिड मिलानेले फैसलापछि भने ‘उनी (ग्रेस) यस्तो निर्दयी तरिकाले मारिन लायक थिइनन् । ग्रेसलाई हामीबाट सबैभन्दा निर्मम तरिकाले टाढा लगिएको छ । हाम्रो परिवार र जीवन पूरै उजाड भएको छ । हाम्रो बाँकी जीवन पूरै उजाड नै रहनेछ ।’ उनले अगाडि भने ‘आज भएको हत्याको फैसला मिलाने परिवारका सबै सदस्यबाट स्वीकार गरिनेछ । तर, यसले हामीले भोगेको पीडालाई भने घटाउन सक्ने छैन ।’