काठमाडौं । स्वास्थ्य तथा जनसङ्ख्यामन्त्री भानुभक्त ढकालले सरकारको नीति तथा कार्यक्रमा उल्लेखित स्वास्थ्यका कार्यक्रम प्रभावकारी रुपमा कार्यान्वयन गर्न निर्देशन दिएका छन् । उनले भने, “नीति तथा कार्यक्रम प्रभावकारी रुपमा कार्यान्वयन हुनुप¥यो । संविधान प्रदत्त अधिकार कार्यान्वयन गर्न सहयोग गछौँ । सबै जानकारी लिएपछि मेरो नीति सार्वजानिक गर्छु ।”

स्वास्थ्य सेवा विभाग मातहतका महाशाखा, शाखालगायत निकायका प्रमुखसित मंगलबार टेकुमा जानकारी लिने क्रममा मन्त्री ढकालले आफूले विधि र प्रक्रिया मिचेर केही काम नगर्ने तर विधि र प्रक्रियाबाहिर गएर कार्य सम्पादन भएमा कारवाही गर्ने बताए । गुणस्तरीय स्वास्थ्य सेवामा जनताको पहुँच पु¥याउन, औषधि र उपकरणको अभाव हुन नदिन उनले स्वास्थ्यकर्मीलाई निर्देशन दिँदै स्वास्थ्य सेवामा देखिएका समायोजनको समस्यालाई समाधान गर्न पहल गरिने बताए।

स्वास्थ्य तथा जनसङ्ख्या राज्यमन्त्री नवराज रावतले हाल भइरहेको स्वास्थ्य सेवालाई छिटो र प्रभावकारी रुपमा दिन, अनुगमन र मूल्याङ्कन प्रणालीलाई प्रभावकारी बनाउन आवश्यक रहेको छ भने। मन्त्रालयका सचिव खगराज बरालले समायोजनका जटिलताले स्वास्थ्य सेवा प्रभावित भएको चर्चा गर्दै छात्रवृत्तिमा अध्ययन गरेका चिकित्सक खटाएको स्थानमा गई सेवा दिनुपर्ने बताए। स्वास्थ्य सेवा विभागका महानिर्देशक डा रोशन पोखरेलले प्रदेश र स्थानीय तहबीच समन्वय अभाव, समायोजनका समस्या, बजेट अभाव, स्वास्थ्य सेवा ऐन तथा नियमावली संशोधनको आवश्यकता रहेको बताए। रासस